Patrimonio: La Iglesia y Colegio de la Compañía en Graus

1232

La Compañía de Jesús é una orden que respeta votos de pobreza, caridá i obediencia, principalmente al Papa romano. Dedicaus a la enseñanza i la evangelización, van adquirí rápidamente poder intelectual i filosófico i, asinas tamé, económico i patrimonial. San Ignacio de Loyola, cofundadó de la orden, va formá la provincia d’Aragón, que teniba centros en las principals ciudaz, i Graus eba el colegio más al norte.

 La ilesia é una copia de la matriz, la del Gesú de Roma, con pllanta de cruz llatina, crucero i cimborrio,  capillas laterals i púlpito, i en la pllanta superió, tribunas i coro. No conoixem l’autoría d’esta ilesia, onque bels autós apuntan que sería realizada per dos arquitectos que alavez viviban a Graus i que tamé traballarían a la catedral de Roda.

D’entre las personalidaz vinculada al monumento, destaca per encima de todas Baltasar Gracián, el milló escritó aragonés del barroco i el más reconoixiu a nivel internacional de la historia. Va visitá Graus varias veces, i pareix que en una d’ixas estancias escribiría la segunda parte de la suya obra más conoixida, El Criticón, como diz el retrato que se conserva en el centro.
El Colegio de la Compañía de Graus va sé una pieza fundamental ta’l desarrollo educativo i cultural d’esta comarca, impartín-se estudios de llatín, gramática o matemáticas. Con la expulsión definitiva de los jesuitas de Graus en 1873, el ayuntamiento va seguí fén serví el colegio. En 1919 la ilesia se va torná a ubrí al culto, i en 1922 parte del colegio va sé concediu pel ayuntamiento a la parroquia de San Miguel ta la instauración de las escuelas infantils del Ave María. 

 

En los años 70 del siglo pasau van dixá d’usá-lo, i el colegio va sé desmontau i trasladau pedra a pedra ta Torreciudá, one s’estaba construín el nuevo santuario. La ilesia va sé cedida nuevamente al ayuntamiento, i dimpués d’uns años en los que sirve d’almacén de objetos etnológicos, a finals de los 90 empeza a gestioná-se el proyecto de rehabilitación del monumento, que remata en diciembre de 2006 con la suya reapertura como Espacio Pirineos, el Centro de Cultura, Investigación y Ocio del Pirineo. 

Más información en www.espaciopirineos.com y en Facebook Cultura Graus